由里斯本市中心的Rossio廣場, 望去Sao Jorge城砦
響我臨離開Lisbon準備返香港之前, 原本想利用手上既Lisbon Card, 好好地參觀Lisbon, 不料就響這時候落雨!! 尾二個日幸好只是落o左整個上午, 當我中午前往Belem區遊覽兼食午飯時, 個天開始停雨而且有太陽。
Torre de Belem貝倫塔, 在葡萄牙偉大的大航海時代, 眾冒險家及海員的家屬就會來到這裡唱著Fado 送行
發現紀念碑, 紀念一眾航海冒險家, 當中最為人所熟悉的有達伽瑪 (da Gama) 及發現非洲好望角的狄亞士 (Dias)
Jeronimos修道院的南門, 其初期的經費正正就是來自冒險家遠征海外所得的財富
Belem區來來去去都係去一d指定動作, 如航海紀念碑、古塔同埋修道院, 另外亦都參觀o左Alfama區既聖安東尼教堂, 個博物館好細, 所以展品不多 (不過d藍色瓷磚畫好靚), 同埋好熱, 因為個度開衡o左個暖氣系統。
98世博場地, 遠處的塔是為了突顯葡萄牙人的航海成就而設計, 乍看來有點兒像杜拜著名的帆船酒店, 當然以這裡的建築年份較早吧!
參觀完Belem區, 去o左98世博場地, 好靜英英, 而且個度d建築物本身唔算係太突出, 但係如果有大把時間行o下街都係好既, 事關近地鐵個邊有個大型商場, 算係整個世博區最旺既地方, 個度有個大型supermarket, 規模有d似以前家樂福咁, 乜都有得買。
里斯本市中心, 這裡的電車好鬼型
另外我仲行o左個條響我手上本guide book(唔係歐陸個本)號稱為葡萄牙香榭麗舍大道既自由大道, 完全係勁吹水唔抹咀, 雖然係綠樹林蔭, 但係繁華程度卻與真正既香榭麗舍大道相差甚遠, 我曾經於三個不同時段行, 都係十分冷清, 咖啡店亦沒有像香榭麗舍大道那麼多, 真係”見鬼”!!
商業廣場Praca do Comercio, 左手邊的凱旋門是這裡的入口
講起熱鬧, 相對於我之前所去過既摩洛哥、直布羅陀同西班牙, 葡萄牙既夜晚實在係冷清得好緊要, 對我呢個”夜貓子”o黎講, 真係有d唔慣!!
烈士紀念碑, 位於號稱為「葡萄牙香榭麗舍大道」的自由大道南端, 雖然這裡是里斯本的市中心, 卻靜到見鬼!
位於烈士廣場附近的瞭望塔, 其設計者與巴黎艾菲爾鐵塔Tour Eiffel是同一人
順道記下我在Lisbon的住宿資料
住: Youth Hostel (Lisbon), 就係地鐵站Picos隔離, 又係同馬德里個YH一樣, 可以免費問reception囉被單及床單, 另外房內亦有毛毯供應, 對我來講可謂來得及時, 事關我去到Lisbon時(九月尾)開始轉涼, 夜晚氣溫得18 C左右。宿費包早餐, 個早餐係半自助形式, 都好豐富, 有麵包、粟米片、麥皮、恰熟雞蛋、各式火腿片 / 芝士連牛油果醬、橙汁(不過好難飲)、汽水、當然唔少得咖啡及朱古力奶(但係冇奶茶供應), 同我以前響挪威Bergen既YH有得fight, 唯一缺點係個度唔俾無限添食添飲, 即係話每樣野只准一次過囉一次。
